इशारा असावा Gazalkar Anil Kambale

Gazalkar Anil Kambale

इशारा असावा

 तुझा चोरटा तो इशारा असावा

नभी मदभरा मग नजारा असावा

कधी हर्ष व्हावा कधी दुःख ल्यावे

खुळ्या आठवांचा पसारा असावा

तुझ्या सोबतीने धुक्याने सजावे

पुन्हा अंगभर तो शहारा असावा

अशी कोणती आस तू लावली की

तुझा फक्त आता सहारा असावा

तिथे टाळले जावयाला उन्हाने

तिथे सावलीचा निवारा असावा

जरी थांग नसतो कधी सागराचा

तरी लाट येण्या किनारा असावा

कसे भ्रष्ट होतील हे लोकनेते

तयांवर जनांचा दरारा असावा

जुन्याकाळच्या त्या प्रथेला उजाळू

मनी पेटलेला निखारा असावा

मनी लोभ येण्यास मज्जाव व्हावा

असा सद्गुणांचा पहारा असावा

   ....अनिल