कसे तुझ्या मनातले Kase Tujhya Manatale

 

Gazalkara Yashashri Rahalkar

कसे तुझ्या मनातले 

न शोधता दिसायचे , कसे तुझ्या मनातले 

न सांगता कळायचे, कसे तुझ्या मनातले

विसावते न वाट ही , न मान्य थांबणे हिला

शहर तिथे वसायचे, कसे तुझ्या मनातले 

तुझे फितूर भाग्य जर, अखेर गाठते तुला

हवे तसे घडायचे, कसे तुझ्या मनातले

मदांध श्वापदे दडून कोपऱ्यात बैसली

ससे धवल जपायचे , कसे तुझ्या मनातले

तुझ्या मनातली जखम , उकल हळूच एकदा

व्रणांस मी पुसायचे , कसे तुझ्या मनातले

जगायचे हिशोब ना , तिच्यासवे जुळायचे

गणित व्यस्त व्हायचे, कसे तुझ्या मनातले

पहाट नीट राखते व्यथेस कोरडे अता

दवात मग भिजायचे ,कसे तुझ्या मनातले

यशश्री_रहाळकर