 |
| Gazalkara Nisha Chausalkar |
पक्षी
काडी काडी साठी काही थकून गेले पक्षी
पंखांना बळ मिळता काही उडून गेले पक्षी
झाल्यावरती वादळ मोठे सपाट झाली झाडे
पुन्हा नव्याने उचलत काड्या रमून गेले पक्षी
डबक्यामधल्या पाण्यामध्ये कुणी सोडल्या होड्या
नाव पाहुनी आठवणींचे हसून गेले पक्षी
इमारतींच्या जंगलामधे गायब झाली झाडे
शोधत जागा घरट्यासाठी निघून गेले पक्षी
वावर सारे उदास पडले, सुकून गेली रोपे
टिपण्यासाठी शोधत दाणा झुरून गेले पक्षी
देह लटकता फांदीवरचा दिसला त्यांना आधी
चोचीमधली फळे टाकुनी पळून गेले पक्षी
कैदेमध्ये दाणा पाणी सारे काही होते
आकाशाच्या विरहामध्ये मरून गेले पक्षी
सौ. निशा चौसाळकर
अंबाजोगाई
0 Comments