• गझल प्रभात • (भाग ८ )
 |
| Gazalkara Anjali Dixit |
🌹आयुष्या म्हणू का मुक्तता माझी 🌹
सांग मी लपवू कशी अस्वस्थता माझी
नेमकी कळली तुला तर सत्यता माझी
ती इथे असते, क्षणामध्ये तिथे जाते
धावते हृदयातली साशंकता माझी
ही तुझी आवड प्रवाही खळखळाटाची
आतुनी ढवळून येते संथता माझी
शब्द जेव्हा उतरुनी आले समेवरती
केवढी भांबावली नि:शब्दता माझी
कोणत्या गुंत्यातले मी प्रश्न सोडवले
उत्तरांनी ठरवली मग पात्रता माझी
एवढ्या चिमण्या कुठुन आल्यात फांदीवर
भंगली आहे मनाची शांतता माझी
पायरीवर टेकला नव्हता जरी माथा
पोळली त्यांना तरी अस्पृश्यता माझी
हाक मृत्यूला दिली मी याचसाठी की
वाटले पडताळुया निष्ठूरता माझी
एकदा स्वप्नात माझ्या बुद्ध हसलेला
हीच आयुष्या म्हणू का मुक्तता माझी
अंजली दीक्षित (पंडित)
छ. संभाजीनगर
=•=•=•=•=•=•=•=•=•=•=•=•=•=•=•=•=•=•=•=•=•=•=•=
संयोजक:- भरत माळी
मो. 9420168806
=•=•=•=•=•=•=•=•=•=•=•=•=•=•=•=•=•=•=•=•=•=•=•=
0 Comments